Manchu Vishnu : కొద్ది రోజుల క్రితం మంచు ఫ్యామిలీలో జ‌రిగిన గొడవ టాలీవుడ్‌లో ఎంత చ‌ర్చ‌నీయాంశంగా మారిందో ప్ర‌త్యేకంగా చెప్ప‌న‌క్క‌ర్లేదు. చాలా విషయాల్లో వీరి మధ్య విబేధాలు ఉన్నాయంటూ గత కొన్ని రోజులుగా బోలెడన్ని వార్తలు షికారు చేసాయి. లోలోపల చాలా గొడవలు జరుగుతున్నాయనే అనేక వార్తలు వ‌చ్చాయి. ఈ క్ర‌మంలో మనోజ్ పోస్ట్ చేసిన వీడియో బ్రదర్స్ ఇద్దరి మధ్య ఉన్న విభేదాలని బహిర్గ‌తం చేసింది. క్రమశిక్షణ అంటే ఖచ్చితంగా మోహన్ బాబు పేరే చెబుతారు. ఆయనతో సినిమా అంటేనే నటీనటులకు ఒకలాంటి బెరుకు. అలాంటి వ్య‌క్తి ఇంట్లో గొడవలు జ‌రుగుతున్నాయి అనే స‌రికి అంద‌రు ఈ ఇష్యూ మీద దృష్టి పెట్టారు.
అయితే ఈ గొడవ గురించి మోహన్ బాబు స్పందించి మనోజ్ పెట్టిన ఆ పోస్ట్ తీయించాడు. ఇద్దరికి వార్నింగ్ కూడా ఇచ్చినట్టు సమాచారం. ఇక విష్ణు, మనోజ్ గొడవపై మంచు లక్ష్మి మాట్లాడుతూ.. అసలు నాకు గొడవ గురించి తెలీదు అంటూ కామెంట్స్ చేసింది. అయితే ఏం జ‌రిగిందా అని అంద‌రు ఆలోచిస్తున్న స‌మ‌యంలో మంచు విష్ణు తన సోషల్ మీడియాలో ఈ వివాదంపై ఓ వీడియోని పోస్ట్ చేయగా ఇందులో.. మనోజ్ పోస్ట్ చేసిన వీడియోతో పాటు అన్ని ఛానల్స్ లో వచ్చిన ఈ గొడవ కవరేజ్, మంచు ఫ్యామిలీకి సంబంధించిన కొన్ని వీడియో బిట్స్ చూపించారు.
ఇందులో నా పేరు విష్ణు మంచు, మోహన్ బాబు గారబ్బాయిని అని చెప్పాడు. చివర్లో ది బిగ్గెస్ట్ రియాలిటీ షో, హౌస్ ఆఫ్ మంచుస్ అని టైటిల్ వేయడంతో అంతా షాక్ అయ్యారు. అలాగే ఈ వీడియోలో ఎక్కడా కూడా మనోజ్ ని చూపించకపోవడం గమనార్హం. వీడియో మొత్తం విష్ణు అతని భార్య పిల్లలు, మోహన్ బాబు మాత్రమే ఉన్నారు. స్ట్రీమింగ్ ఇన్ 2023 అని కూడా పెట్టడం విశేషం. ఇక ఈ వీడియోని పోస్ట్ చేసి ఇది ఆరంభం మాత్రమే అని ఇంగ్లీష్ లో టైటిల్ పెట్టాడు. దీంతో ప్రస్తుతం ఈ వీడియో వైరల్ గా మారింది. అయితే రియాలిటీ షో ప్ర‌మోష‌న్ లో భాగంగా మంచు విష్ణు ఇలాంటి క‌వ‌ర్ డ్రైవ్ ఆడాడా అని అంద‌రు చ‌ర్చించుకుంటున్నారు.
