Liger Movie : వ‌రుస ఫ్లాఫుల‌తో స‌త‌మతం అవుతున్న విజయ్ దేవరకొండ లైగర్ సినిమాతో మ‌ళ్లీ ట్రాక్ లోకి రావాల‌ని అనుకున్నాడు. కానీ ఈ చిత్రం కూడా దారుణ‌మైన నిరాశ‌ని మిగిల్చింది. ఈ చిత్రంపై ఎన్నో అంచ‌నాలు పెట్టుకోగా అవ‌న్నీ తుడిచిపెట్టుకుపోయాయి. విజయ్ దేవరకొండ హీరోగా పూరీ జగన్నాథ్ దర్శకత్వంలో వచ్చిన లైగర్ సినిమా గత నెల 25న విడుదల కాగా భారీ అంచనాల నడుమ రిలీజైన ఈ సినిమా ప్రేక్షకులను ఏ మాత్రం ఆకట్టుకోలేక‌పోయింది. దీంతో విజయ్ – పూరీ కాంబినేష‌న్‌లో ప‌ట్టాలెక్క‌నున్న జ‌న‌గ‌ణ‌మ‌న‌కి కూడా బ్రేకులు ప‌డ్డాయి.
అయితే లైగర్ సినిమా ఫ్లాప్ కావ‌డంతో డిస్ట్రిబ్యూట‌ర్స్ న‌ష్టాల‌లో కూరుకుపోయిన‌ట్టు తెలుస్తుంది. ఆ న‌ష్టాల‌ను పూడ్చేందుకు పూరీ ప్ర‌య‌త్నాలు చేస్తున్నార‌ట. ఇక లైగర్ చిత్రం ఓటీటీలో రాబోతుంద‌ని కొద్ది రోజులుగా వార్త‌లు వ‌స్తున్నాయి. తాజా స‌మాచారం ప్రకారం సెప్టెంబరు 22న తెలుగు, తమిళం, కన్నడ, మలయాళం భాషల్లో డిస్నీ ప్లస్ హాట్ స్టార్ వేదికగా లైగర్ సినిమా స్ట్రీమింగ్ కాబోతుంది. అయితే అనుకున్నదానికంటే నాలుగు వారాల ముందుగానే సినిమా ఓటీటీలోకి అందుబాటులో రానుంది.
ఇటీవల తెలుగు నిర్మాతల మండలి ఇటీవల తీసుకున్న నిర్ణయం ప్రకారం.. ఏ సినిమా అయినా థియేటర్లలో రిలీజైన 8 వారాల వరకు ఓటీటీలో విడుదల చేయకూడదు. కానీ లైగర్ విషయంలో ముందుగానే మేకర్స్.. డీల్ కుదుర్చుకున్నారట. దాంతో సెప్టెంబ‌ర్ 22న చిత్రాన్ని విడుదల చేయ‌బోతున్నార‌ట. ఇక ఈ చిత్రంలో రమ్య కృష్ణ ఇందులో రౌడీ హీరోకు తల్లి పాత్రలో కనిపించింది. అనన్య పాండే హీరోయిన్ కాగా.. రోనిత్ రాయ్ విజయ్‌కు కోచ్‌ పాత్రలో కనిపించారు.
