Krishna Health : కెరీర్‌లో ఎన్నో అద్భుత‌మైన చిత్రాల‌ల‌లో న‌టించి మంచి పేరు ప్ర‌ఖ్యాత‌లు పొందాను న‌ట‌శేఖ‌ర కృష్ణ. ఆయ‌న‌కు ఇటీవ‌ల దెబ్బ మీద దెబ్బ త‌గులుతుంది. సూపర్ స్టార్ కృష్ణ రెండవ భార్య విజయనిర్మల 2019 జూన్ 27న హార్ట్ అటాక్ తో కన్నుమూశారు. అనుకోని ఈ సంఘటన కృష్ణ కుటుంబాన్ని షాక్ కి గురి చేసింది. ఇక ఈ ఏడాది ప్రారంభంలో మహేష్ అన్నయ్య రమేష్ బాబు అకాల మృతి చెందారు. ఆయన మృతి నుండి కోలుకునే లోపు సెప్టెంబ‌ర్ 28 మహేష్ తల్లి, కృష్ణ స‌తీమ‌ణి ఇందిరా దేవి కన్నుమూశారు. ఇలా వ‌రుస విషాదాల‌తో కృష్ణ చాలా కుంగిపోయారు.
సూపర్ స్టార్ కృష్ణ గత కొంత కాలంగా శ్వాస సంబంధిత సమస్యతో బాధపడుతున్నారు. ఆదివారం రాత్రి పరిస్థితి విషమించడంతో మహేష్ బాబు భార్య నమ్రత, కృష్ణను గచ్చిబౌలీలోని కాంటినెంటల్ హస్సిటల్‌లో చేర్చారు అని కాంటినెంటల్ వైద్యులు మీడియాకు తెలిపారు. కృష్ణ ఆరోగ్య ప‌రిస్థితిపై ఆస్ప‌త్రి వైద్యులు మీడియాతో మాట్లాడారు. ప్రస్తుతం కృష్ణ వెంటిలేట‌ర్‌పై ఉన్న‌ట్టు పేర్కొన్నారు. 24 గంట‌లు గ‌డిస్తే త‌ప్ప ఏమీ చెప్ప‌లేమ‌న్నారు. శ‌రీరం స‌హ‌క‌రిస్తుందా? లేదా? అనేది ఇప్పుడే చెప్ప‌లేమ‌న్నారు. కార్డియాక్ అరెస్ట్‌తో అర్ధ‌రాత్రి స‌మ‌యంలో ఆయ‌న్ను ఆస్ప‌త్రికి తీసుకొచ్చార‌న్నారు. అప్ప‌టికే ఆయన స్పృహ‌లో లేర‌ని వైద్యులు చెప్పారు. ప్రస్తుతం ఆయన ఇంటెన్సీవ్ కేర్‌లో ఉంచి చికిత్స అందిస్తున్న‌ట్టు వారు తెలియ‌జేశారు.
అంత‌ర్జాతీయ‌స్థాయి వైద్యాన్ని కృష్ణ‌కు అందిస్తున్న‌ట్టు వైద్యులు వెల్లడించారు. మొద‌ట ఆయన స్వ‌ల్ప అస్వ‌స్థ‌త‌కు గురైన‌ట్టు వార్త‌లొచ్చాయి. త్వ‌ర‌గా కోలుకుని వ‌స్తార‌ని అనుకున్నారు. కానీ వైద్యులు కృష్ణ ఆరోగ్య పరిస్థితి ఆందోళ‌న‌క‌రంగా ఉన్న‌ట్టు చెప్ప‌డంతో అభిమానులు ఆందోళ‌న‌లో ఉన్నారు. 24 గంటల తర్వాత హెల్త్ బులిటెన్ విడుదల చేస్తామని కాంటినెంటల్ ఆసుపత్రి వైద్యులు వెల్లడించారు. కృష్ణ త్వ‌ర‌గా కోలుకొని క్షేమంగా బ‌య‌ట‌కు రావాల‌ని ఆయన అభిమానులు ప్రార్ధ‌న‌లు చేస్తున్నారు.
