Kesineni Nani : విజయవాడ రాజకీయం ఆసక్తి కరంగా మారుతుండ‌డం మ‌నం చూస్తూనే ఉన్నాం. విజయవాడలో పూర్వ వైభవం సాధించాలని టీడీపీ ప్రయత్నిస్తోంది. పట్టు నిలబెట్టుకోవాలని సీఎం జగన్ కొత్త వ్యూహాలు అమలు చేస్తున్నారు. టీడీపీ ఎంపీ కేశినేని నాని వైసీపీలో చేరటంతో..వచ్చే ఎన్నికల్లో ఆయనకు సీటు కేటాయించారు. ఎన్టీఆర్ జిల్లాలో టీడీపీని 60 శాతం ఖాళీ చేస్తానని కేశినేని మరోసారి చెప్పుకొచ్చారు. దీంతో నాని ఏం చేయబోతున్నారనేది రాజకీయంగా ఆసక్తిని పెంచుతోంది. మ‌రోవైపు బెజవాడలో అన్నాదమ్ముల్ల మధ్య సవాళ్లు.. ప్రతిసవాళ్లు కంటిన్యూ అవుతూనే ఉన్నాయి. అన్న ఒకటంటే.. తమ్ముడు రెండంటూ పాలిటిక్స్ ను మరింత హీటు పెంచుతున్నారు.
విజయవాడలో టీడీపీ 60 శాతం ఖాళీ అవ్వడం ఖాయమంటూ వైసీపీ నేత కేశినేని నాని పేర్కొన్నారు. అవసరం అయితే వందశాతం ఖాళీ చేయిస్తాన్నారు. కేశినేని చిన్నివి ఉత్తరకుమార ప్రగల్భాలు అంటూ పేర్కొన్న నాని… తన స్థాయి చంద్రబాబు స్థాయి.. అంటూ సంచలన వ్యాఖ్యలు చేశారు. ఎవరు పడితే వాళ్లకు సమాధానం ఇవ్వనంటూ. బుద్ధా వెంకన్న, కేశినేని చిన్నిపై నాని సెటైర్లు వేశారు. కాల్ మనీ వ్యాపారస్తుల మాటలకు స్పందించాల్సిన అవసరం తనకు లేదని.. తన గురించి మాట్లాడే వాళ్లు.. వాళ్ల స్థాయి ఏంటో తెలుసుకుంటే బాగుంటుందని కేశినేని నాని పేర్కొన్నారు. అయితే కేశినేని నాని టీడీపీలో ఉన్నప్పుడు, స్వతంత్రంగా వ్యవహరించేవారు. తాను చంద్రబాబుతో సమాన స్థాయి ఉన్న నేతగా భావించుకునే వారు. ఆ కారణంగానే పార్టీలో సీనియర్లు చాలా మంది ఆయనకు దూరంగా మెలిగే వారు.
అయితే అదంతా కేశినేని బిల్డప్ మాత్రమేనని వైసీపీ గూటికి చేరిన రోజుల వ్యవధిలోనే బట్ట బయలైపోయింది. విజయవాడ ఎంపీగా తనతోపాటు.. మరో ఐదుగురు నేతలకు, అసెంబ్లీ సీటు ఇవ్వాలని ఆయన వైసీపీ అధినేతకు సిఫార్సు చేయ‌డంతో ససేమిరా అన్న సర్దుకు పోయారు. ఇక ఇటీవల బెజవాడలో జరిగిన పలు వైసీపీ కార్యక్రమాలకు కేశినేని నాని హాజ‌రు కాగా,ఆయన ప‌రిస్థితి గుంపులో గోవిందా అన్న‌ట్టు మారింది. టీడీపీలో ఉన్నప్పుడు ఆయనకు మంచి గౌరవం ఉండేది. వైసీపీలో మాత్రం లాంటి ప్రాధాన్యతా లభించడం లేదు. విజయసాయిరెడ్డి ముందు వరసలో ఉండి, మీడియాతో మాట్లాడితే… స్వతంత్ర భావాలుండి, ఎక్కువ ప్రాధాన్యం కోరుకునే కేశినేని నాని మాత్రం.. ఎమ్మెల్యే మల్లాది విష్ణు వెనుక నిలబడి ఉన్న ఫొటో ఒకటి ఇప్పుడు మీడియాలో తెగ వైరల్ అవుతోంది. ఇటీవల జరిగిన అంబేడ్కర్ విగ్రహావిష్కరణ కార్యక్రమంలో ఎంపీగా ఇవ్వాల్సిన ప్రోటోకాల్ కూడా ఇవ్వకుండా వైసీపీ నానిని మరింత ఘోరంగా అవమానించ‌డంతో ఆయన మాన‌సికంగా కుంగిపోతున్న‌ట్టుగా అర్ధమ‌వుతుంది.
