Kavya Maran : ఈ సారి అద్భుత‌మైన ఆట‌తీరు క‌న‌బ‌ర‌చిన ఎస్ఆర్‌హెచ్ ఆట‌గాళ్లు ఫైనల్లో చ‌తికిల‌ప‌డ్డారు. బ్యాట్స్‌మెన్ అంతా వెంట‌వెంట‌నే క్యూ క‌ట్ట‌డంతో హైదరాబాద్ జట్టు ఎక్కువ ప‌రుగులు చేయ‌లేక‌పోయింది.ఆఖరి మజిలీ దగ్గర తడబడి ట్రోఫీకి దూరమైంది. ఈ సీజన్‌కు ముందుగానే వనిందు హసరంగాను కోల్పోయిన ఎస్ఆర్‌హెచ్.. పవర్‌ప్లే హార్డ్ హిట్టింగ్‌తో ప్రత్యర్ధులను హడలెత్తించింది. ఆల్‌రౌండ్ పెర్ఫార్మన్స్ చూపించిన కేకేఆర్ మాదిరిగానే.. సన్రైజర్స్ కూడా సేమ్ టీంతో ఐపీఎల్ 2025కి వెళ్లాలని యోచిస్తోంది. ఐపీఎల్ 2024 ఫైనల్లో ఓడి.. టైటిల్‌కి అడుగు దూరంలో నిలిచిపోయిన సన్రైజర్స్ హైదరాబాద్ జట్టుపై ఆ టీమ్.. కో-ఓనర్ కావ్య మారన్ ప్రశంసల జల్లు కురిపించారు.
మ్యాచ్ ఓడిపోయిన తర్వాత కన్నీళ్లతో నిరాశగా కనిపించిన కావ్య.. ఆ తర్వాత తేరుకొని, ఎస్ఆర్‌హెచ్ డ్రెస్సింగ్ రూమ్‌లోకి వెళ్లారు. ఆటగాళ్లను ప్రశంసించారు. దురదృష్టవశాత్తు తృటిలో టైటిల్ చేజారినా.. తాము తల ఎత్తుకునేలా చేశారని ఆటగాళ్లను కొనియాడారు. ఆటగాళ్లలో ధైర్యం నింపే ప్రయత్నం చేశారు. ఇందుకు సంబంధించిన వీడియోను సన్రైజర్స్ హైదరాబాద్ జట్టు సోషల్ మీడియాలో పంచుకుంది. గయ్స్.. మీరు మేం తల ఎత్తుకునేలా చేశారు. ఈ విషయాన్ని చెప్పేందుకే నేను ఇక్కడికి వచ్చా. నిజంగా మీరు టీ20 క్రికెట్ ఎలా ఆడాలి అనే పదానికి కొత్త నిర్వచనం చెప్పారు.
ప్రతి ఒక్కరూ మన గురించి మాట్లాడుకునేలా.. ఆరెంజ్ ఆర్మీ ఫ్యాన్స్ కాలర్ ఎగిరేసేలా ప్రదర్శన చేశారు. దురదృష్టవశాత్తూ ఈ రోజు మనం అనుకున్నది జరగలేదు. కానీ, మీరు మాత్రం ఈ సీజన్‌లో బ్యాటింగ్, బౌలింగ్‌లో అసాధారణ ప్రదర్శన కనబర్చారు. అందరీకి ధన్యవాదాలు’ అని కావ్య మారన్ అన్నారు. కావ్య మారన్ జట్టు ఆటగాళ్లతో మాట్లాడిన తీరు, ఓటమితో బాధలో ఉన్నప్పటికీ.. నిరాశతో డ్రెస్సింగ్ రూంలో ఉన్న ఆటగాళ్లను తన పవర్ ఫుల్ స్పీచ్ తో ఉత్సాహపర్చిన తీరును చూసిన నెటిజన్లు ఆమెపై ప్రశంసల జల్లు కురిపిస్తున్నారు.
