Sanju Samson : టీమిండియా వెటరన్ బ్యాటర్ సంజూ శాంసన్‌కి గ‌తంలో ఎక్కువ‌గా ఛాన్స్ లు ఇవ్వ‌క‌పోవ‌డంతో బీసీసీఐపై నెటిజ‌న్స్ ఆగ్రహం వ్యక్తం చేసేవారు. మంచి టాలెంట్ ఉన్నా కూడా సంజూ శాంస‌న్‌ని ఎందుకు పెడుతున్నారంటూ మండిప‌డేవారు. అయితే శ్రీలంకతో జ‌రిగిన మూడు టీ20ల సిరీస్ లో భాగంగా రెండు మ్యాచ్‌ల‌కి అతనికి అవకాశం క‌ల్పించారు. వరుసగా రెండో మ్యాచ్‌లోనూ డకౌటయ్యాడు. శ్రీలంకతో రెండో టీ20లో గోల్డెన్ డక్ అయిన సంజూ శాంసన్.. మూడో టీ20లోనూ పరుగులు ఏం చేయకుండానే వెనుదిరిగాడు. బ్యాటింగ్‌కు ప్రతికూలంగా ఉన్న వికెట్‌పై సంజూ నిలబడలేకపోయాడు.సంజూ శాంసన్ అవకాశాన్ని సద్వినియోగం చేసుకోవడంలో విఫలమై వరుసగా రెండో గేమ్‌లోనూ నిరాశపరిచాడు.
జైస్వాల్ వికెట్ పతనం తర్వాత 3వ నంబర్‌లో బ్యాటింగ్‌కు వచ్చిన సంజూ శాంసన్ 4 బంతులు ఎదుర్కొని ఖాతా కూడా తెరవలేకపోయాడు. భారీ షాట్ కొట్టేందుకు యత్నించిన సంజు హసరంగాకు క్యాచ్ ఇచ్చి పెవిలియన్ చేరాడు. దీని ద్వారా సంజూ తన పేరు మీద అవాంఛిత రికార్డు కూడా సృష్టించుకున్నాడు. సంజూ శాంసన్ వైఫల్యాలపై అభిమానులు ఆగ్రహం వ్యక్తం చేస్తున్నారు. రాక రాక వచ్చిన రెండు అవకాశాలను సంజూ శాంసన్ నేలపాలు చేసుకున్నాడని మండిపడుతున్నారు. దరిద్రానికే సంజూ శాంసన్ బ్రాండ్ అంబాసిడర్ అని సెటైర్లు పేల్చుతున్నారు. సంజూ శాంసన్‌ను ఎవ్వడూ రక్షించలేడని, అతని కెరీర్‌కు ఎండ్ కార్డ్ పడినట్లేనని అభిప్రాయపడుతున్నారు.
ఓవైపు రిషభ్ పంత్ రీఎంట్రీ.. మరోవైపు ధ్రువ్ జురెల్, జితేశ్ శర్మలతో పోటీ.. మధ్యలో రియాన్ పరాగ్ ఆల్‌రౌండర్ ఎదుగుతుండటంతో సంజూ శాంసన్‌కు జట్టులో దారులు మూసుకుపోయాయి. వికెట్ కీపర్‌గా కాకున్నా.. టీ20లకు రిటైర్మెంట్ ప్రకటించిన విరాట్ కోహ్లీ స్థానంలోనైనా సంజూ శాంసన్‌కు అవకాశం దక్కుతుందని అంతా భావించారు. కానీ అతని చెత్త ప్రదర్శన.. టీమిండియాకు దూరం చేసేలా ఉందని ఫ్యాన్స్ ఆవేదన వ్యక్తం చేస్తున్నారు. బ్యాటింగ్‌లో రాణించ‌క‌పోయిన వికెట్ కీపింగ్ లో అయిన మెప్పించాడా అంటే అది లేదు. చెత్త కీపింగ్‌తో విమ‌ర్శ‌ల బారిన ప‌డుతున్నాడు. మూడో టీ20లో నిశాంక, కుశాల్ మెండిస్‌ల క్యాచ్‌ల‌ని నేల పాలు చేశాడు. గ‌త 10 టీ 20ల‌లో సంజూ శాంసన్ ఒక్క అర్ధ సెంచరీ చేశాడు. అది కూడా జింబాబ్వేపై. మూడు మ్యాచ్‌ల‌లో డ‌కౌట్. ఈ గ‌ణాంకాల‌ని చూసి సంజూ శాంసన్ కెరీర్ క‌ష్టాల‌లో ప‌డ్డ‌ట్టే అని కొంద‌రు జోస్యం చెబుతున్నారు.
