Akhanda Movie : నందమూరి బాల‌కృష్ణ – మాస్ డైరెక్ట‌ర్ బోయపాటి కాంబినేష‌న్‌లో సినిమా అంటే అంచ‌నాలు ఏ రేంజ్‌లో ఉంటాయో ప్ర‌త్యేకంగా చెప్ప‌న‌క్క‌ర్లేదు. సింహా, లెజెండ్ చిత్రాల త‌ర్వాత బాల‌కృష్ణ, బోయపాటి శ్రీను కాంబినేష‌న్‌లో రూపొందిన అఖండ చిత్రం వారి కాంబోకి హ్యాట్రిక్ హిట్ మూవీగా నిలిచింది. సాధార‌ణ ప‌రిస్థితుల్లో సినిమా విడుదలై హిట్ అయితే మాములుగానే ఉండేది కాని కోవిడ్ వంటి క‌ఠిన ప‌రిస్థితుల‌ను ఓ వైపు.. ఏపీలో త‌గ్గించిన టికెట్ ధ‌ర‌ల స‌మ‌స్య మ‌రో వైపు.. ఉన్న‌ప్పుడు ఈ సినిమా విడుదలై ఘ‌న విజ‌యాన్ని సొంతం చేసుకుంది.
ఈ చిత్రంలో ప్రగ్యా జైస్వాల్ హీరోయిన్ గా నటించింది. జగపతిబాబు, శ్రీకాంత్, పూర్ణ కీలకపాత్రల‌లో నటించారు. థమన్ ఈ చిత్రానికి సంగీతం అందించారు. భారీ అంచనాల నడుమ గతేడాది డిసెంబర్ 2న ప్రపంచవ్యాప్తంగా విడుదలై, మంచి వసూళ్లను రాబట్టింది. రెండు పాత్ర‌లలో బాల‌య్య త‌న న‌ట విశ్వ‌రూపం చూపించి ప్రేక్ష‌కుల‌కి మంచి ఎంట‌ర్‌టైన్‌మెంట్ అందించారు. అయితే ఈ సినిమా ఇటీవ‌ల బుల్లితెర‌పై కూడా ప్ర‌సారం అయి మంచి టీఆర్పీ రాబట్టింది.
సినిమా మంచి ఎంట‌ర్‌టైనింగ్‌గానే సాగిన ఇందులో బోయపాటి చేసిన చిన్న మిస్టేక్ చ‌ర్చ‌నీయాంశంగా మారింది. సినిమాలో ఫైట్ సీన్ జరిగే సందర్భంలో ఓ నటుడు విలన్ పక్కన గూండాగా కనిపించాడు. అదే గూండా పోలీస్ అవ‌తారంలో క‌నిపించి ఆశ్చ‌ర్య‌ప‌రిచాడు. అంటే ఒక్క న‌టుడికి రెండు పాత్రలు ఇచ్చి దొరికిపోయాడు బోయపాటి. దాంతో బోయపాటి పై నేటిజన్స్ ట్రోల్స్ చేస్తున్నారు.
సాధార‌ణంగా ఇలాంటి మిస్టేక్స్ సినిమాల‌లోనే అప్పుడ‌ప్పుడు క‌నిపిస్తూనే ఉన్నా బాల‌కృష్ణ యాంటీ ఫ్యాన్స్ మాత్రం దీనిని తెగ హైలైట్ చేస్తున్నారు. కాగా, అఖండ‌లో ముర‌ళీకృష్ణ అనే రైతు పాత్ర‌ను, అఘోర పాత్రైన అఖండ‌ని ఎంతో బ‌లంగా మ‌లిచారు బోయపాటి. మంచి యాక్ష‌న్ స‌న్నివేశాలు, డైలాగ్స్ అన్నీ తోడవ‌డంతో సినిమా ప్రేక్ష‌కుల‌ను అల‌రించింది. ద్వారకా క్రియేష‌న్స్ బ్యాన‌ర్‌పై మిర్యాల ర‌వీంద‌ర్ రెడ్డి ఈ చిత్రాన్ని నిర్మించారు.
