Ex DSP Nalini : సీఎంకి చాలా ఉద్వేగభ‌రితంగా లేఖ రాసిన న‌ళిని.. వైర‌ల్‌గా మారిన లేఖ‌..

Ex DSP Nalini : నళిని.. కొద్దిరోజులుగా ఈ పేరు చుట్టు తెగ చర్చ న‌డుస్తుండ‌డం మ‌నం చూస్తూనే ఉన్నాం. ప్రత్యేక తెలంగాణ ఉద్యమ సమయంలో.. తన డీఎస్పీ పదవికి రాజీనామా చేసి వార్తాల్లోకి ఎక్కింది న‌ళిని. ఉద్యమ వాణిని వినిపించేందుకు పరకాల బైపోల్ బరిలోనూ నిలబడ్డారు. ఉద్యమ సమయంలో ఎంతో పేరు సంపాదించికున్న నళిని… ప్రత్యేక రాష్ట్రం వచ్చిన తర్వాత ఆమె ప్రస్తావన పెద్దగా లేకుండా పోవ‌డం చ‌ర్చ‌నీయాంశంగా మారింది. అయితే రేవంత్ రెడ్డి సీఎం అయ్యాక పోలీస్ శాఖపై సమీక్ష నిర్వహించారు. ఈ సందర్భంగా… నళినికి తిరిగి డీఎస్సీ ఉద్యోగం ఎందుకు ఇవ్వకూడదనే అంశంపై ఆరా తీశారు. పోలీసు ఉద్యోగం కుదరకపోతే… అదే స్థాయిలో ఉండే మంచి ఉద్యోగాన్ని ఇవ్వాలని పోలీసులకు ఆదేశాలు ఇచ్చారు. ఈ విషయంలో నళినితో మాట్లాడి తగిన చర్యలు తీసుకోవాలని సూచించారు.

అయితే తనకు తిరిగి ఉద్యోగం ఆఫర్ చేయటంపై మాజీ డీఎస్పీ నళిని స్పందించారు. సీఎం రేవంత్ రెడ్డి తనపై చూపిస్తున్న అభిమానానికి కళ్లు చెమ్మగిల్లుతున్నాయన్నారు. గతం ఒక రీల్‌లో తన కళ్ల ముందు కదలాడుతుందని చెప్పారు. తనకు తిరిగి ఉద్యోగం చేసే ఆసక్తి లేదని.. తనలోని డైనమిక్ ఆఫీసర్‌ని గతంలోనే హత్య చేశారని ఫేస్‌బుక్‌లో సుదీర్ఘ పోస్టు రాశారు.గౌరవనీయులైన సీఎం గారు.. మీరు నాపై చూపిస్తున్న అభిమానానికి నా కళ్లు చెమ్మగిల్లుతున్నాయి. మీ ఆత్మీయత నా హృదయానికి గొప్ప స్వాంతన కలిగించింది. ఈ నేపథ్యంలో గతం ఒక రీల్ లా నా కళ్ల ముందు కదులుతుంది. ఇన్నాళ్లు నేను ఒక సస్పెండ్ ఆఫీసర్ గా ‘ సోషల్ స్టిగ్మా ( మరక) ‘ను మోసాను. నన్ను ఆనాటి ప్రభుత్వం 3 ఏండ్లు చాలా ఇబ్బంది పెట్టింది.

ఒక్క మాటలో చెప్పాలంటే క్షణక్షణం ఒక గండంలా గడిచింది. తెలంగాణ ఉద్యమం ఉవ్వెత్తున లేచినప్పుడు, 2009 డిసెంబర్ 9న నేను చేసిన రాజీనామా చాలా సంచలనం రేకెత్తించింది. అదే రాత్రి చిదంబరం గారు చేసిన ప్రకటన ఉద్యమాన్ని చప్పున చల్లార్చింది. నాటి సీఎం రోశయ్య గారు మహిళ దినోత్సవం రోజున నాకు నా ఉద్యోగాన్ని కానుకగా తిరిగి ఇస్తున్నట్లు ప్రకటిస్తే ,నేను రాజీనామాను విత్ డ్రా చేసుకొని డిపార్ట్మెంట్ లో చేరాను. నా జీవితంలో నేను చేసిన అతి పెద్ద తప్పు అదే అని అన్నారు. ఉమ్మడి రాష్ట్రంలో నాకు సీఎం అపాయింట్‌మెంట్ కూడా దొరకలేదు. బయట ఉద్యమ నాయకులను సంప్రదిస్తే వాళ్లు నాకు సహాయం చేయకపోగా నన్ను ఎగతాళి చేశారు అని నళిని త‌న బాధ‌ని చెప్పుకొచ్చింది.