Chiranjeevi : మెగాస్టార్ చిరంజీవి ఒక‌ప్పుడు స్టార్ హీరోగా ఎంత పేరు ప్ర‌ఖ్యాత‌లు సంపాదించుకున్నారో ప్ర‌త్యేకంగా చెప్ప‌న‌క్క‌ర్లేదు. ఆ త‌ర్వాత రాజ‌కీయాల‌లోకి వ‌చ్చారు. కష్టపడి మాత్రం కొనసాగ దలచుకోలేదు. ఆయన ప్రజా సేవ చేయాలని తపించిన వారే. ఆయనలో ఆ సేవాభావం లేకపోతే బ్లడ్ బ్యాంక్ ఐ బ్యాంకులను ఎందుకు స్థాపిస్తారు. అది కూడా సినిమాల్లో బిజీగా ఉంటూ ఆయన చేసిన సేవా కార్యక్రమాలు అవి.రాజకీయాల్లో హుందాతనం లేకపోవడంతో పాటు చిరంజీవి మృదువుగా వ్యవహరించే నేచర్ వల్ల కొనసాగలేక పోయారు. పైగా ఆయన రాజకీయ అరంగేట్రం సమయం కూడా రాంగ్ గా ఉంది.
ఒక వైపు వైఎస్సార్ మరణం చెందడం, మరో వైపు ఉమ్మడి ఏపీ రెండుగా చీలడంతో ఆయన ఏ వైపు ఉండాలో ఏమి చేయాలో కూడా అర్థం కాని పరిస్థితి అని అనుకున్నారు అంతా. అయితే చిరంజీవి తెలివిగా చేసింది ఏంటి అంటే తన ప్రజారాజ్యం పార్టీని కాంగ్రెస్ లో విలీనం చేసి రాజ్యసభ సభ్యుడు అయ్యారు. కేంద్ర మంత్రి అయ్యారు. అలా తన రాజకీయ ప్రస్థానానికి అందమైన ముగింపు ఇచ్చారు. అంతే 2018లో చిరంజీవి రాజ్యసభ సభ్యత్వం ముగిసిన తరువాత ఆ వైపు తొంగి చూడలేదు, వంగి వాలలేదు. గత పది సంవత్సరాలలో కాంగ్రెస్ పార్టీ సభలు, సమావేశాలకు దూరంగా ఉంటున్న మెగాస్టార్ చిరంజీవి ఆ పార్టీ నాయకులతో అంటిముట్టన్నట్లు వ్యవహరిస్తున్నారు.
ప్ర‌ధాని నరేంద్ర మోదీ మెగాస్టార్ చిరంజీవికి ఎక్కువ ప్రాధాన్యత ఇవ్వడంతో ఇక చిరంజీవి కాంగ్రెస్ పార్టీకి పూర్తిగా దూరమైనట్లే అని అందరూ అనుకున్నారు. అయితే మెగాస్టార్ చిరంజీవి పుట్టినరోజు సందర్భంగా కాంగ్రెస్ పార్టీ హై కమాండ్ ఊహించని షాక్ ఇచ్చింది. చిరంజీవి కాంగ్రెస్ పార్టీ సభ్యత్వాన్ని 2027 అక్టోబర్ నెల వరకు రెన్యువల్ చేసిన ఐడి కార్డును కాంగ్రెస్ పార్టీ విడుదల చేయడంతో మెగాస్టార్ చిరంజీవి అభిమానులు షాక్ అయ్యారు. మ‌రోవైపు కాంగ్రెస్ పార్టీ ఇప్ప‌టికీ చిరంజీవి త‌మ పార్టీలో ఉన్నాడ‌ని చెప్పుకుంటుండ‌డం కొస‌మెరుపు.
