Doctor BS Rao : చైత‌న్య విద్యాసంస్థ‌ల అధినేత బీఎస్ రావు ప్ర‌స్థానం.. ఆయ‌న ఆస్తి ఎంతో తెలుసా..?

Doctor BS Rao : శ్రీచైతన్య విద్యాసంస్థల వ్యవస్థాపకులు, చైర్మన్ బీఎన్ రావు కన్నుమూసిన విష‌యం తెలిసిందే. ఇంట్లోని బాత్రూమ్‌లో కాలు జారి కింద పడటంతో ఆయన ప్రాణాలు కోల్పోయారు. రక్తపు మడుగులో పడి ఉన్న ఆయన్ను ఆస్పత్రికి తరలించగా.. అప్పటికే చనిపోయినట్లు వైద్యులు ధృవీకరించారు. బీఎస్ రావు మృతి పట్ల టీడీపీ అధినేత చంద్రబాబు నాయుడు, ఇతర రాజకీయ ప్రముఖులు దిగ్భ్రాంతి వ్యక్తం చేశారు. ఆంధ్రాకు చెందిన బీఎన్ రావు దంపతులు.. ఇంగ్లండ్, ఇరాన్‌లో వైద్యులుగా సేవలించారు. ఆ తరువాత పుట్టిన గడ్డకు వచ్చి.. 1986లో శ్రీ చైతన్య విద్యాసంస్థలను స్థాపించారు.

తొలుత విజయవాడలో గర్ల్స్ జూనియర్ కాలేజీని స్థాపించిన బీఎన్ రావు.. అంచెలంచెలుగా కాలేజీలను విస్తరించారు. విజయవాడ నుంచి మొదలైన శ్రీ చైతన్య కాలేజీ ప్రస్థానం.. తెలుగు రాష్ట్రాల్లోనే కాకుండా దేశ వ్యాప్తంగానూ విస్తరించింది. ప్రస్తుత దేశ వ్యాప్తంగా 321 జూనియర్ కాలేజీలు, 322 టెక్నో స్కూల్స్, 107 సీబీఎస్‌ఈ స్కూల్స్ ఉన్నాయి. శ్రీ చైతన్య విద్యా సంస్థల్లో దాదాపు 8.50 లక్షల మంది విద్యార్థులు విద్యనభ్యసిస్తున్నారు. ఒకానొక సమయంలో తాను ఎలా విద్యావేత్తగా మారానన్న వివరాలను బీఎస్ రావు వెల్లడించారు. తాను ఇరాన్‌లో పని చేస్తున్న సమయంలో భారత్‌కు వచ్చి తన కుమార్తెల విద్య కోసం ఓ మంచి కాలేజీ కోసం వెతికాననని.. ఆ క్రమంలోనే బాలికల కోసం ప్రత్యేకించి కళాశాలలు తనకు కనిపించలేదని బీఎస్‌ రావు గతంలో ఓ ఇంటర్వ్యూలో తెలిపారు.

పదో తరగతిలో మంచి ఫలితాలు సాధిస్తున్న విద్యార్థులు ఇంటర్మీడియట్ విద్యకు వచ్చేసరికి సరైన ప్రతిభ కనబరచలేకపోవడం కూడా తాను విద్యా సంస్థ ఏర్పాటు చేసేందుకు మరో ప్రేరణ కలిగించిందని బీఎస్ రావు అన్నారు. ఇంటర్మీడియట్ విద్యార్థుల కోసం పోటీ పరీక్షలకు శిక్షణా సంస్థను స్థాపించగా.. అనతి కాలంలోనే తమ విద్యా సంస్థకు చెందిన విద్యార్థులు ఐఐటీ, నీట్‌లలో మంచి ర్యాంకులు సాధించాయని అన్నారు. 2006లో హిమాచల్‌ప్రదేశ్‌, చండీగఢ్‌, జార్ఖండ్‌, మధ్యప్రదేశ్ రాష్ట్రాల్లో ఐఐటీ- జేఈఈ, ఏఐఈఈఈ కోచింగ్‌ సెంటర్లను ఏర్పాటు చేశారు. ఆ సమయంలోనే అమెరికాలో ఉన్న తన కుమార్తెలు సీమా, సుష్మా భారత్‌కు వచ్చి తన తండ్రికి చేదోడువాదోడుగా ఉంటూ చైతన్య విద్యా సంస్థలను దేశ వ్యాప్తంగా విస్తరించడంలో కీలక పాత్ర పోషించారు.