CM Revanth Reddy : అమ్మగారు లేరని బతుకమ్మ ఆగుతదా రాహుల్‌.. రేవంత్ రెడ్డి సెటైర్..

CM Revanth Reddy : తెలంగాణలో కాంగ్రెస్ ప్రభుత్వం అధికారంలోకి వచ్చి వంద రోజులు అయింది. ప్రతిపక్ష బీఆర్ఎస్ పార్టీ… నాలుగు కోట్ల ప్రజలను నమ్మించి కాంగ్రెస్‌ పార్టీ మోసం చేసిందంటూ దుయ్యబట్టింది. కాంగ్రెస్‌కు అధికారం ఇస్తే.. తెలంగాణను అంధకారంలోకి నెట్టేస్తారా అంటూ తెలంగాణ ప్రజలు ప్రశ్నిస్తున్నారంటూ పేర్కొంది. వంద రోజుల పాలనలో పచ్చని తెలంగాణను కరువుకు కేరాఫ్‌గా మార్చేశారంటూ ఆగ్రహం వ్యక్తం చేసింది బీఆర్ఎస్. ఈ మేరకు.. బీఆర్ఎస్ ట్విట్టర్ వేదికగా 100 రోజుల పాలనపై 100 ప్రశ్నలు అంటూ పోస్ట్ పెట్టింది. “వంద రోజుల్లో.. వంద తప్పులు.. పదేళ్ల తరువాత.. రైతులకు తిప్పలు.. నాలుగు కోట్ల ప్రజలను నమ్మించి మోసం చేసిన అబద్ధాల హస్తం” అంటూ దుయ్యబట్టింది బీఆర్ఎస్. కాని రేవంత్ రెడ్డి ప్ర‌భుత్వం మాత్రం వాటిని కొట్టిపారేసే ప్ర‌య‌త్నం చేసింది.

అయితే ఇదిలా ఉంటే క‌విత అరెస్ట్ ఇటీవ‌ల దేశ‌వ్యాప్తంగా ఎంత హాట్ టాపిక్ అయిందో ప్ర‌త్యేకంగా చెప్ప‌న‌క్క‌ర్లేదు. ఈడీ అరెస్టు చేయడంపై సీఎం రేవంత్ రెడ్డి స్పందించారు. ఇది ఎన్నికల స్టంట్ అంటూ ఆయన విమర్శించారు. బీఆర్ఎస్ అధినేత కేసీఆర్.. తన కుమార్తె కవిత అరెస్టుపై ఎందుకు స్పందించడం లేదని ప్రశ్నించారు. ‘కవిత అరెస్టును కేసీఆర్ ఎందుకు ఖండించలేదు.?. కేసీఆర్, ప్రధాని మోదీ మౌనం వెనుక వ్యూహం ఏంటి.? గతంలో ఈడీ వచ్చాక మోదీ వచ్చేవారు. అయితే, శుక్రవారం మోదీ, ఈడీ కలిసే వచ్చారు. కేసీఆర్ కుటుంబం, బీజేపీ మద్యం కుంభకోణాన్ని ధారావాహికలా నడిపించారు. కవిత అరెస్ట్ బీఆర్ఎస్, బీజేపీ ఆడుతున్న డ్రామా. ఎన్నికల షెడ్యూల్ కు ఒక రోజు ముందే జరిగిన ఈ పరిణామాన్ని ఏ విధంగా అర్థం చేసుకోవాలి.

రాష్ట్రంలో కాంగ్రెస్ ను దెబ్బ తీసేందుకు బీఆర్ఎస్, బీజేపీలు కలిసి చిల్లర రాజకీయాలు చేస్తున్నాయి. ఈ అరెస్ట్ ఎన్నికల స్టంట్. తెలంగాణకు ప్రధాని మోదీ చేసింది ఏమీ లేదు. ఆయనకు ఇక్కడ ఓట్లు అడిగే అర్హత లేదు.’ అని రేవంత్ పేర్కొన్నారు. వంద రోజుల్లో చాలా చేశామని.. ఇంకా చేయాల్సింది చాలా ఉందని సీఎం రేవంత్ అన్నారు. గత పదేళ్లలో కేసీఆర్ ప్రభుత్వం వందేళ్లకు సరిపడా విధ్వంసం చేసిందని విమర్శించారు. రాష్ట్రాన్ని పూర్తిగా అప్పుల ఊబిలోకి నెట్టారని మండిపడ్డారు. ‘ప్రగతి భవన్ ను ప్రజా భవన్ గా మార్చి.. సచివాలయంలోకి సాధారణ ప్రజలు వచ్చేందుకు స్వేచ్ఛ ఇచ్చాం. భేషజాలకు పోకుండా ప్రధాని, కేంద్ర మంత్రులను కలిసి రాష్ట్ర హక్కుగా రావాల్సిన వాటిని రాబట్టగలిగాం అని అన్నారు. అలానే అమ్మ‌గారు జైల్లో ఉంది క‌దా అని మ‌న పండుగ‌లు ఆప‌డం అనేది జ‌ర‌గ‌ద‌ని రేవంత్ అన్నారు. బోనాలు, బ‌తుక‌మ్మ త‌ప్ప‌నిస‌రిగా జరుగుతాయంటూ ఆయ‌న తెలియ‌జేశారు.