CM Revanth Reddy : తెలంగాణలో ఇవాళ అసెంబ్లీ సమావేశాలు వాడి వేడిగా జ‌ర‌గ‌డం మ‌నం చూశాం. ఈ సందర్భంగా సీఎం రేవంత్ రెడ్డి మాట్లాడుతూ పలు ఆసక్తికర వ్యాఖ్యలు చేశారు. పదేళ్లలో గత ప్రభుత్వం తీసుకున్న నిర్ణయాలను ప్రజల ముందు పెట్టామన్నారు. ప్రజలకు మంచి చేయాలన్న ఉద్దేశంతోనే శ్వేతపత్రం విడుదల చేసామన్నారు సీఎం. అర్హులైన వారికి సంక్షేమం అందించి దేశంలోనే తెలంగాణను బలమైన రాష్ట్రంగా నిలబెట్టడమే మా లక్ష్యమన్నారు రేవంత్ రెడ్డి. ఆదాయం, అవసరాలకు సంబంధించి రిజర్వు బ్యాంకు వద్ద నుంచి వివరాలు తీసుకున్నామన్నారు.
బీఆర్ఎస్ కు అధికారం అప్పగించే నాటికి.. రిజర్వ్ బ్యాంకు వద్ద మన నిధుల నిల్వలు సగటున 303 రోజులు ఉండేవన్నారు. బీఆరెస్ అధికారంలోకి వచ్చాక సగటున ఇందులో సగం రోజులు కూడా లేవని తెలిపారు. రోజూ అప్పు కావాలని వాళ్ల దగ్గర నిలబడాల్సిన పరిస్థితి వచ్చిందన్నారు.శ్వేత పత్రం ఎవరినో కించపరచడానికి… అవమానించడానికి కాదన్నారు. మేం ప్రకటించిన గ్యారంటీలను ఎగ్గొట్టడానికి కాదన్నారు. వాస్తవ పరిస్థితిని ప్రజలకు వివరించేందుకే ఈ శ్వేతపత్రం విడుదల చేశామన్నారు ముఖ్యమంత్రి రేవంత్ రెడ్డి. ఆర్ధిక శాఖ కార్యదర్శి సంతకం పెట్టి ఇచ్చిందే ఈ నివేదిక అన్నారు. మీకు ఏవైనా అపోహలు ఉంటే తొలగించుకోవాలన్నారు. రాష్ట్రానికి రావాల్సిన నిధుల కోసం ప్రధానిని కలిసేందుకు కిషన్ రెడ్డిగారికి తాను ఫోన్ చేశానన్నారు. స్వార్ధ రాజాకీయాల కోసం కాకుండా ప్రజల కోసం మేం ఆలోచిస్తున్నామన్నారు.
కేసీఆర్ కు రాజకీయంగా అవకాశం ఇచ్చిందే కాంగ్రెస్ పార్టీ.. ఎంపీగా, కేంద్రమంత్రిగా కేసీఆర్ కు కాంగ్రెస్ ఛాన్స్ ఇచ్చింది.. పోతిరెడ్డిపాడు గురించి.. పీజేఆర్ ఒక్కరే పోరాటం చేశారు. ఇప్పుడు మాట్లాడుతున్న వాళ్లు ఎవరూ కొట్లాడలేదు. ఐదేళ్ల సమయం ఉంది.. ఏమేమి జరిగిందో.. అన్నీ లెక్కలతో సహా వివరిస్తాం. 9 ఏళ్ల పాలనపై ఎక్స్ రే తీసినట్లు అన్నీ బయటపెడతాం’ అని సీఎం రేవంత్ రెడ్డి అసెంబ్లీలో ప్రసంగించారు.
