Chiranjeevi : మెగాస్టార్ చిరంజీవి ఇప్ప‌టికీ కుర్ర హీరోలతో పోటీ ప‌డుతూ సినిమాలు చేస్తున్నారు. అలానే యంగ్ జ‌న‌రేష‌న్ తో పాటు తన స‌న్నిహితుల‌కి ఎలాంటి అవ‌స‌రం వచ్చిన కూడా సపోర్ట్ అందిస్తున్నారు. తాజాగా తెలుగు సినీ పాత్రికేయ చరిత్ర’ పుస్తకాన్ని ఆవిష్కరించారు. ఈ పుస్తకాన్ని సీనియర్ సినీ పాత్రికేయుడు వినాయకరావు రచించారు. భారతీయ తొలి సినీ పత్రిక విశేషాలు, నాటి సినీ జర్నలిస్టుల నుంచి నేటి సినీ జర్నలిస్టుల వివరాలను ఈ పుస్తకంలో పొందుపరిచారు. పుస్తకావిష్కరణ సందర్భంగా చిరంజీవి ఆసక్తికర ప్రసంగం చేశారు. తన కెరీర్ ఆరంభం నుంచి సినీ పాత్రికేయులతో, రచయితలతో తనకు ఆత్మీయ అనుబంధం ఉందని చిరంజీవి అన్నారు.
ఒక్కోసారి జర్నలిస్టులు రాసే వార్తలు వాస్తవానికి దూరంగా ఉంటూ దుమారం సృష్టిస్తుంటాయని అభిప్రాయపడ్డారు. కొన్ని వార్తల కారణంగా తాను కూడా కలత చెందిన సందర్భాలు ఉన్నాయని చెప్పారు. ఎప్పుడో వచ్చిన ఆ వార్తల తాలూకు ప్రభావం నేటికీ వెంటాడుతూనే ఉండడం బాధాకరం అని చిరంజీవి పేర్కొన్నారు.గ‌తంలో గొల్లపూడి, జంధ్యాల, సత్యమూర్తి, సత్యానంద్ వంటి వారితో తరచుగా మాట్లాడేవాడినని, అదే అలవాటు నేటికీ ఉందని చెప్పారు. రచయితలకు, పాత్రికేయులకు తన హృదయంలో ప్రత్యేకస్థానం ఉందని అన్నారు. ‘తెలుగు సినీ పాత్రికేయ చరిత్ర’ పుస్తక రచయిత వినాయకరావుపై చిరంజీవి ప్రశంసల జల్లు కురిపించారు.
ఏ పుస్తకం రాసినా కూలంకషంగా చర్చిస్తూ, లోతుల్లోకి వెళ్లి రాయడం వినాయకరావుకు అలవాటు అని తెలిపారు. అలాగే, వినాయకరావు అరుదైన ఫొటోలు సేకరిస్తుంటాడని, భావితరాలను దృష్టిలో ఉంచుకుని అతడు చేసే ప్రయత్నం అభినందనీయం అని పేర్కొన్నారు. వినాయకరావు… ఎన్టీఆర్, దాసరి, కృష్ణ గురించి పలు పుస్తకాలు రాశాడని, తన గురించి కూడా పుస్తకం రాశాడని చిరంజీవి వెల్లడించారు. ఇలాంటి వాళ్లు పుస్తకాలు రాసే ప్రయత్నాన్ని మానుకోకూడదని అన్నారు. ‘తెలుగు సినీ పాత్రికేయ చరిత్ర’ పుస్తకాన్ని తాను కూడా కొంటున్నానని చిరంజీవి తెలిపారు. ఇక చిరు సినిమాల విష‌యానికి వ‌స్తే.. బింబిసార ఫేమ్ వ‌శిష్ట ద‌ర్శ‌క‌త్వంలో మూవీ చేయ‌నున్నాడు.
