Chandra Babu : నెల్లూరులో చంద్రబాబు సమక్షంలో వేమిరెడ్డి దంపతులు టీడీపీలో చేరారు. ఈ సందర్భంగా మాట్లాడిన చంద్రబాబు మాజీ మంత్రి అనిల్ కుమార్ యాదవ్ పై కౌంటర్లు విసిరారు. వీపీఆర్ కన్వెన్షన్ లో జరిగిన సభలో టీడీపీ అధినేత చంద్రబాబు సమక్షంలో చాలామంది వైసీపీ నేతలు పసుపు కండువాలు కప్పుకున్నారు. తొలుత వేమిరెడ్డి ప్రభాకర్ రెడ్డి దంపతులు టీడీపీలో చేరారు. ఆ తర్వాత నెల్లూరు డిప్యూటీ మేయర్ రూప్ కుమార్ యాదవ్ కూడా చంద్రబాబు సమక్షంలో టీడీపీలో చేరారు. కప్పిన అనంతరం… ఎమ్మెల్యే కోటంరెడ్డి శ్రీధర్ రెడ్డి వచ్చి.. ఈయన అనిల్ కుమార్ కు బాబాయ్ అంటూ రూప్ కుమార్ యాదవ్ ను చంద్రబాబుకు పరిచయం చేశారు.
అవునా… అంటూ చంద్రబాబు రూప్ కుమార్ భుజం తట్టారు. దీనికి సంబంధించిన వీడియో సోషల్ మీడియాలో వైరల్ అవుతోంది. నెల్లూరు వైసీపీలో ఎప్పటినుంచో ఆధిపత్య పోరు ఉంది! నెల్లూరు సిటీ ఎమ్మెల్యేగా ఉన్న అనిల్ కుమార్ కు, ఆయన బాబాయి, నెల్లూరు కార్పొరేషన్ డిప్యూటీ మేయర్ రూప్ కుమార్ యాదవ్ కు మధ్య విభేదాలు పలు సందర్భాల్లో వెల్లడయ్యాయి. రూప్ కుమార్ యాదవ్ ముఖ్య అనుచరుడు అబ్దుల్ హాజీపై కొన్నాళ్ల కిందట దాడి జరిగింది. తాను రూప్ కుమార్ కు మద్దతు ఇస్తున్నందునే తనపై దాడి చేశారని హాజీ ఆరోపించాడు.
అయితే ఈ సభలో అనీల్ కుమార్ యాద‌వ్‌పై చంద్రబాబు నాన్‌స్టాప్ పంచ్ లు వేయడం ఆస‌క్తికరంగా మారింది. తంతే మూడు జిల్లాల అవ‌త‌ల ప‌డ్డాడు. ఒక‌ప్పుడు ఒంటి మీద గుడ్డ‌లు ఆగ‌లేదు. క‌న్ను మిన్ను కాన‌కుండా ఎగిరాడు. అలాంటి మ‌న మంత్రి అయ్యాడు అది మ‌న ఖ‌ర్మ. మొన్న జరిగిన బ‌దిలీలో మ‌నోడిని తంతే ఒక్క జిల్లా మూడు జిల్లాల అవ‌త‌ల ప‌డ్డాడు.ఒక‌ప్పుడు బుల్లెంట్ దిగిందా అని డైలాగులు కొట్టేవాడు. ఇప్పుడు ఆయ‌న‌కే బుల్లెట్ దిగింది అంటూ చంద్రబాబు.. అనీల్ కుమార్ యాద‌వ్‌పై విరుచుకుప‌డ్డారు.
