BTech Ravi Son Ramiredddy : టీడీపీ మాజీ ఎమ్మెల్సీ బీటెక్ రవిని స్పెషల్ బ్రాంచ్ పోలీసులు అరెస్ట్ చేసిన విషయం తెలిసిందే. పోలీసులంతా మప్టీలో ఉండటంతో వారంతా పోలీసులేనా.. లేకుంటే గుర్తుతెలియని వ్యక్తులు కిడ్నాప్ చేశారా..? అని కుటుంబ సభ్యులు, టీడీపీ శ్రేణులు ఆందోళన చెందాయి. రవి అరెస్టును పోలీసులు అధికారికంగా నిర్ధారించారు. మొదట వల్లూరు పోలీస్ స్టేషన్‌కు తరలించిన పోలీసులు అక్కడ్నుంచి కడప రిమ్స్‌కు తరలించారు. అయితే రవి విషయంలో అసలు ఏం జరిగింది..? అనే విషయాలను కడప జిల్లా డీఎస్పీ షరీప్ ప్రెస్‌మీట్ ఏర్పాటు చేసి తెలియ‌జేశారు.
పది నెలలు కిందట కడప విమానాశ్రయం దగ్గర ఆందోళన చేసినందుకు బీటెక్ రవిని అరెస్ట్ చేశాం. తోపులాటలో మా ఏఎస్ఐకి గాయాలయ్యాయి. దానిపైన విచారణ చేసి ఇప్పు డు కేసు నమోదు చేసి అరెస్ట్ చేశాం. 10 నెలలుగా రవి అందుబాటులో లేరు. అందుకే ఇప్పుడు అన్ని పరిశీలించి అరెస్ట్ చేయాల్సి వచ్చింది’ అని డీఎస్పీ షరీప్ మీడియాకు వివరించారు. అయితే.. 10 నెలల విషయం ఇప్పుడు ఎందుకు బయటికి తీసినట్లు ఎందుకు అనే దానిపై ఇప్పుడు అంత‌టా డిస్క‌ష‌న్ న‌డుస్తుంది.
బీటెక్ రవి అరెస్ట్‌పై యువనేత నారా లోకేష్ ట్విట్టర్ వేదికగా స్పందించారు. ‘పుట్టిన ఊరు, గెలిచిన నియోజ‌క‌వ‌ర్గం అయిన పులివెందుల వెళ్లాల్సి వ‌చ్చినా జ‌గ‌న్ రెడ్డి గ‌జ‌గ‌జా వ‌ణుకుతున్నాడు. ప‌ర‌దాలు, బారికేడ్లు, ముంద‌స్తు అరెస్టులు, దుకాణాల మూసివేత, చెట్ల న‌రికివేత ఇన్ని చేసినా ఓట్లేసిన జ‌నంని చూడాలంటే జ‌గ‌న్ రెడ్డికి భ‌యం. సొంత నియోజ‌క‌వ‌ర్గ ప్రజ‌ల్ని ఎదుర్కోలేని పిరికి పంద జ‌గ‌న్. రాజకీయ కక్షసాధింపుకి పోలీసుల్ని పార్టీ కార్యకర్తల్లా వాడుకుంటున్నాడు. రవి అక్రమ అరెస్ట్‌ను తీవ్రంగా ఖండిస్తున్నాను.
ఆయనకి ఏం జ‌రిగినా జ‌గ‌న్, పోలీసుల‌దే బాధ్యత’ అని లోకేష్ ట్విట్టర్‌లో రాసుకొచ్చారు. మ‌రోవైపు రవి త‌న‌యుడు రామిరెడ్డి కూడా సంచ‌ల‌న ఆరోప‌ణ‌లు చేశారు. మా నాన్నకు పులివెందులలో వస్తున్న ఆదరణను చూసి తట్టుకోలేక అక్రమ అరెస్టు చేశారని టిడిపి ఇంచార్జ్ బీటెక్ రవి కుమారుడు రామిరెడ్డి విమర్శించారు. గురువారం పులివెందుల టిడిపి కార్యాలయంలో ఆయన మాట్లాడుతూ. అన్యాయంగా తన తండ్రిపై అక్రమ కేసులు పెట్టి అరెస్ట్ చేశారన్నారు. ఎటువంటి నోటీసులు లేకుండా అరెస్ట్ చేయడం ఎంత వరకు న్యాయం అని ప్రశ్నించారు. బెట్టింగ్ కేసులో కూడా అన్యాయంగా మానాన్న పేరు చేర్చారని స్ప‌ష్టం చేశారు.
