Bhanu Priya : బాల‌కృష్ణ నేను క్లాస్‌మేట్స్.. ఆస‌క్తిక‌ర కామెంట్స్ చేసిన భానుప్రియ‌..

Bhanu Priya : చారడేసి కళ్లు.. కోలాటమాడే కనురెప్పలు అనగానే మ‌నంద‌రికి భానుప్రియ గుర్తుకు వ‌స్తుంది. వెండితెర‌పై ఆమె చేసిన క‌వాతు గురించి ప్ర‌త్యేక ప‌రిచ‌యాలు అక్కర్లేదు. 1980లలో ఒక వెలుగు వెలిగిన భానుప్రియ, ప్రస్తుతం తన స్థాయికి తగిన కేరక్టర్ రోల్స్ చేస్తూ వెళుతున్నారు.తాజాగా ఆమె ఓ ఇంట‌ర్వ్యూలో మాట్లాడుతూ ఆస‌క్తిక‌ర వ్యాఖ్యలు చేశారు. “బాపు గారు అంటే నాకు చాలా ఇష్టం .. తన సినిమాల్లో ఆయన హీరోయిన్ ను చూపించే స్టైల్ నాకు బాగా నచ్చుతుంది. హీరోయిన్ కళ్లకు ఆయన ఎక్కువ ప్రాధాన్యతనిస్తూ ఉంటారు.

అందువలన ఆయన నుంచి నాకు పిలుపు వస్తుందని నేను ఎదురు చూశాను. కానీ ఆయన నుంచి నాకు అవకాశం రాలేదు. ఆయనను నేను కలవలేకపోయాను కూడా. ఒక్క మాటలో చెప్పాలంటే ఆయనతో సినిమా రాసిపెట్టి లేదంతే” అని అన్నారు. “ఇక విశ్వనాథ్ గారి విషయానికి వస్తే .. షూటింగులో బాగా చేస్తే ‘చాలా బాగా వచ్చింది’ అని భుజం తట్టి అభినందించేవారు. వెంకటేశ్ గారు డాన్స్ విషయంలో మా అత్తమ్మ దగ్గర స్టూడెంట్. అప్పట్లో ఆయన ఎక్కువగా మాట్లాడేవారు కాదు .. చాలా రిజర్వ్డ్ గా ఉండేవారు. తెరపై మా కాంబినేషన్ కి మంచి పేరు వచ్చింది” అని చెప్పారు.

సుమ‌న్ గారితో 14 సినిమాలు చేసిన భానుప్రియ ఆయ‌న గురించి గొప్ప‌గా చెప్పింది.చాలా మంచి వ్య‌క్తి అంటూ తెగ పొగ‌డ్త‌లు కురిపించింది. ఇక బాల‌కృష్ణ గారితో 9 సినిమాలు చేసిన‌ట్టు చెప్పిన భానుప్రియ ఆయ‌న నేను స్కూల్ ఫ్రెండ్స్ మాదిరిగా ఉంటాం. మంచి వ్య‌క్తి అని తెలిపింది. అమ్మ‌తో కూడా చాలా ప్రేమ‌గా మాట్లాడతారు. అమ్మ‌కి బాల‌య్య గారు చాలా ఇష్ట‌మ‌ని భానుప్రియ పేర్కొంది. బాల‌య్య‌ని క‌లిసి చాలా రోజులైంది. ఒక‌సారి ఎయిర్‌పోర్ట్‌లో క‌లిసిన‌ప్పుడు చాలా స‌ర‌దాగా మాట్లాడారు.హైదరాబాద్ వ‌స్తే ఒక‌సారి ఇంటికి రా అని త‌న ఫోన్ నెంబ‌ర్ కూడా ఇచ్చార‌ని భానుప్రియ చెప్పుకొచ్చింది.