Bhanu Chandar : టాలీవుడ్ సినిమా స్థాయిని పెంచిన ద‌ర్శ‌కుడు రాజమౌళి. బాహుబ‌లి సినిమాతో దేశ వ్యాప్తంగా పేరు తెచ్చుకున్న రాజమౌళి ఇటీవ‌ల ఆర్ఆర్ఆర్ సినిమాతో ప‌ల‌క‌రించాడు. ఈ సినిమాకి ఆస్కార్ అవార్డ్ కూడా ద‌క్క‌డం మ‌నం చూశాం. అయితే ఇప్పుడు మ‌హేష్ బాబుతో మ‌రో క్రేజీ ప్రాజెక్ట్ చేస్తున్నాడు. ఈ సినిమా కోసం ప్ర‌తి ఒక్క‌రు ఎంతో ఆస‌క్తిగా ఎదురు చూస్తున్నారు. అయితే ఇలాంటి స‌మ‌యంలో రాజమౌళి గురించి సీనియ‌ర్ హీరో భానుచందర్ చేసిన కామెంట్స్ చర్చనీయాంశంగా మారాయి. ప్రముఖ టాలీవుడ్ నటులలో ఒకరైన భానుచందర్ ఎక్కువగా ఫీల్ గుడ్ మూవీస్ తో గుర్తింపు పొందారు. అప్పట్లో సంగీత దర్శకుడిగా రాణించిన మాస్టర్ వేణు కుమారుడే భానుచందర్. ఆయన వారసుడిగా ఇండస్ట్రీలోకి అడుగుపెట్టారు.
కె విశ్వనాథ్ దర్శకత్వంలో భానుచందర్ నటించిన సూత్రధారులు చిత్రం జాతీయ అవార్డు కూడా గెలుచుకుంది. అయితే ఆయన ఇప్పుడు ప‌లు సినిమాలు, సీరియ‌ల్స్‌లో స‌పోర్టింగ్ క్యారెక్ట‌ర్స్‌లో క‌నిపిస్తూ సంద‌డి చేస్తున్నాడు. అయితే తాజాగా ఆయన ఓ ఇంట‌ర్వ్యూలో ఆస‌క్తిక‌ర విష‌యాలు వెల్ల‌డించారు. ముఖ్యంగా రాజమౌళి గురించి చేసిన కామెట్స్ ఇప్పుడు హాట్ టాపిక్‌గా మారాయి. భాను చంద‌ర్.. రాజమౌళి దర్శకత్వంలో సింహాద్రి చిత్రంలో కీలక పాత్రలో నటించిన సంగతి తెలిసిందే. అయితే రాజమౌళి సినిమాలంటే తనకి అసలు ఇష్టం లేదని , రాజమౌళి సినిమాలు నచ్చనంత మాత్రాన ఆయన మంచి దర్శకుడుకాదు అని అర్థం కాదని అన్నారు. రాజమౌళి గొప్ప దర్శకుడే.. కానీ ఆయన తెరకెక్కించే చిత్రాలు నాకు నచ్చవు అంటూ భాను చంద‌ర్ అన్నారు.
రాజమౌళి తెరకెక్కించే సినిమాల‌కి నేను అభిమానిని కాదు. అలానే ప్రశాంత్ నీల్ కెజిఎఫ్ చిత్రం కూడా నాకు ఏమాత్రం నచ్చలేదు. కె విశ్వనాథ్, బాలచందర్ లాంటి దర్శకుల సినిమాల‌ని నేను ఎక్కువగా ఇష్ట‌ప‌డ‌తాను. అయితే రాజమౌళి తెర‌కెక్కించిన బాహుబ‌లి చిత్రంలోని ఎమోష‌న్‌కి నేను క‌నెక్ట్ కాలేదు. కేజీఎఫ్‌, బాహుబ‌లి చిత్రాల‌లోని ఒక్క సీన్ కూడా నా హృద‌యాన్ని క‌దిలించ‌లేక‌పోయాయి. అందుకే ఆ చిత్రాలు నాకు నచ్చవు అంటూ ఆస‌క్తిక‌ర కామెంట్స్ చేశారు భాను చంద‌ర్. ఆయన చేసిన కామెంట్స్ ఇప్పుడు చర్చనీయాంశంగా మారాయి.
