టీ 20 వరల్డ్ కప్ నుంచి ఆస్ట్రేలియా నిష్క్రమణ.. మండిపడుతున్న ఫ్యాన్స్, మీడియా..!

టీ 20 వరల్డ్‌ కప్‌ 2022లో చాలా జట్లు అంచనాలకు మించి రాణిస్తుంటే.. కొన్నిజట్లు మాత్రం అంచనాలను గల్లంతు చేస్తున్నాయి. అలాంటి జట్లలో ముందువరుసలో ఉంది ఆస్ట్రేలియా. అఫ్గాన్‌పై గెలిచిన తర్వాత వారి సెమీస్‌ ఆశలు ఇంగ్లాండ్‌ చేతుల్లో ఉన్నాయి. అయితే ఆఖరి ఓవర్‌ వరకు మ్యాచ్‌ను లాక్కొచ్చి ఎలాగో శ్రీలకంపై ఇంగ్లాండ్‌ జట్టు విజయం సాధించింది. నిజానికి న్యూజిలాండ్- ఇంగ్లాండ్‌- ఆస్ట్రేలియాలకు సమానంగానే పాయింట్లు ఉన్నా కూడా.. నెట్‌ రన్‌రేట్‌ లో చాలా తేడా ఉంది. ఇంగ్లాడ్‌ నెట్‌ రన్‌రేట్‌ మెరుగ్గా ఉండటంతో ఆస్ట్రేలియా ఎలిమినేట్ ‌అయిపోయింది. ఆస్ట్రేలియా ఓటములకు పునాది న్యూజిలాండ్‌ వేసింది. తొలి మ్యాచ్‌లో 89 పరుగుల భారీ తేడాతో ఆసీస్‌ను చావుదెబ్బ కొట్టింది.

ఆ తర్వాత శ్రీలంక 7 వికెట్ల తేడాతో భారీ విజయాన్నే నమోదు చేసింది. కానీ, మూడో మ్యాచ్‌ మాత్రం వర్షార్పణం అయ్యింది. అది గెలిచుంటే ఆస్ట్రేలియాకు ఒక పాయింట్‌ ఎక్కువే ఉండేది. కానీ, వర్షం కూడా వీరి ఓటమిలో కీలక పాత్ర పోషించింది. ఐర్లాండ్‌ లాంటి జట్టుపై 42 పరుగుల తేడాతో విజయాన్ని నమోదు చేసినా కూడా.. ఆఫ్గనిస్తాన్‌ జట్టు మాత్రం ఆస్ట్రేలియా నెట్ రన్‌ రేట్‌పై గట్టి దెబ్బే కొట్టింది. ముఖ్యంగా రషీద్‌ ఖాన్‌ 48 పరుగులు చేసి అజేయంగా నిలిచాడు. అతను కొట్టిన ప్రతి పరుగు ఆస్ట్రేలియాని సెమీస్‌కు దూరం చేశాయి. శ్రీలంక గెలుపు కోసం లంక అభిమానుల కంటే ఆస్ట్రేలియా అభిమానులే ఎక్కువగా ఎదురుచూశారు. ఒకానొక దశలో శ్రీలంక గెలుస్తుందేమోనన్న ఆశ కూడా లంక అభిమానుల్లో కలిగింది.

అయితే.. ఒక్క ఫోర్‌తో క్రిస్ ఓక్స్ లంక అభిమానుల ఆశలతో పాటు ఆస్ట్రేలియా సెమీస్ ఆశలపై కూడా నీళ్లు చల్లాడు. అయితే ఈ పరాజయం పట్ల జట్టు ఎలా స్పందించినా ఆస్ట్రేలియా ఫ్యాన్స్, మీడియా ఈ ఓటమిని జీర్ణించుకోలేకపోయారు. ఆస్ట్రేలియా మీడియా జట్టుని ఫాస్ట్ అండ్ బ్రూటల్ అంటూ తీవ్రంగా విమర్శించింది. నిజం చెప్పాలంటే, ఆసీస్ నిజంగా సెమీస్‌కు చేరుకోవడానికి ఎప్పుడూ అర్హులు కాదు అని ది ఆస్ట్రేలియన్ వార్తాపత్రిక పేర్కొంది. గత 30 ఏళ్లలో ఏ ఫార్మాట్ లో అయినా ఆస్ట్రేలియా వరల్డ్ కప్ లో సెమీస్ కు చేరకపోవడం ఇది నాలుగోసారి మాత్రమే. అందులోనూ ఇప్పుడు ఆతిథ్య జట్టుగా, డిఫెండింగ్ ఛాంపియన్ బరిలోకి దిగిన ఆస్ట్రేలియా ఘోరపరాభావం మూట కట్టుకొని అందరినీ ఆశ్చర్యపరిచింది.