Arjun : సీనియర్ హీరో అర్జున్, టాలీవుడ్ లో ఓ సినిమా నిర్మిస్తున్న విషయం తెలిసిందే. ఈ సినిమా విషయంలో యంగ్ హీరో విశ్వక్ సేన్ తో ఆయనకు వివాదం ఏర్పడింది. ఇటీవలే ప్రెస్ మీట్ పట్టి మరీ విశ్వక్ సేన్ ఆగడాలను బయటపెట్టారు అర్జున్. ఈ ప్రెస్ మీట్‌లో విశ్వక్ సేన్‌పై అర్జున్ చేసిన కామెంట్స్ దుమారం రేపాయి. టాలీవుడ్ లో హాట్ టాపిక్‌గా మారాయి. అర్జున్ ఈ సినిమాలో అతని కూతురు ఐశ్వర్యను హీరోయిన్ గా చేస్తుండగా.. విశ్వక్ సేన్ ని హీరోగా తీసుకున్నారు.
సినిమా షూటింగ్ సందర్భంగా కొన్ని విషయాల్లో అర్జున్ కి, విశ్వక్ సేన్ కి మధ్య బేధాభిప్రాయాలు వచ్చాయి. అయితే అనూహ్యంగా ఈ సినిమా నుంచి విశ్వక్ సేన్ తప్పుకున్నాడు. ఇదిలా ఉంటే ఇప్పుడు ఈ మూవీ కోసం అర్జున్ మరో యంగ్ హీరోను తీసుకునే యోచనలో ఉన్నారట. ఇది తెలుగులో తన కూతురు ఫస్టు సినిమా కావడంతో ఈ సినిమాను ఆపేసే ఆలోచనలో అర్జున్ లేరని తెలుస్తోంది. పైగా తాను పని ఇస్తానని చెప్పి తీసుకొచ్చిన ఏ టెక్నీషియన్ కూడా పని లేదని చెప్పి వెనక్కి పంపించడం తనకి అలవాటు లేదని కూడా ఆయన స్పష్టం చేశారు.
దీంతో సాధ్యమైనంత త్వరగా మరో హీరోతో ఈ సినిమాను పట్టాలెక్కించడానికి ఆయన సిద్ధంగా ఉన్నారని సన్నిహితవర్గాల నుంచి సమాచారం. అయితే ఈ కథకి శర్వానంద్ కరెక్టుగా సరిపోతాడని భావించిన ఆయన, ఆ దిశగా సంప్రదింపులు జరుపుతున్నారనే టాక్ వినిపిస్తోంది. శర్వానంద్ మొదటి నుంచి కూడా చాలా కూల్‌గా సినిమాలు చేస్తూ వెళ్తున్నాడు. చాలాకాలం తరువాత ఒకే ఒక జీవితం సినిమాతో హిట్ అందుకున్నాడు శర్వానంద్. మరి శర్వానంద్ అర్జున్‌కు ఓకే చెబుతాడో లేదో చూడాలి.
