Aratikaya Podi Kura : అరటికాయ పొడి కూర తయారీ ఇలా.. ఈ విధంగా చేస్తే.. ఇష్టంగా తింటారు..

Aratikaya Podi Kura : మనకు అందుబాటులో ఉన్న పలు రకాల కూరగాయల్లో కూర అరటి కాయలు ఒకటి. వీటిని తినేందుకు చాలా మంది ఇష్టపడరు. కానీ వీటిని ఉపయోగించి సరైన రీతిలో కూర చేయాలేకానీ ఎవరైనా సరే ఇష్టంగా తింటారు. ఈ క్రమంలోనే కూర అరటికాయలతో మనం పొడి కూరను కూడా తయారు చేయవచ్చు. ఇది ఎంతో రుచిగా ఉంటుంది. దీన్ని ఎలా తయారు చేయాలో ఇప్పుడు తెలుసుకుందాం.

కూర అరటికాయ పొడి కూర తయారీకి కావల్సిన పదార్థాలు..

కూర అరటికాయలు – 3, ఉల్లిపాయ – 1, పసుపు – పావు టీస్పూన్‌, ఉప్పు – తగినంత, మసాలా ముద్ద కోసం – కొబ్బరి తురుము – 4 టేబుల్‌ స్పూన్లు, చింత పండు – చిన్న నిమ్మకాయంత, బెల్లం తురుము – ఒక టీస్పూన్‌, మసాలా పొడి కోసం – మినప పప్పు – 2 టీస్పూన్లు, ఎండు మిర్చి – 8, ధనియాలు – 2 టీస్పూన్లు, సోంపు – 1 టీస్పూన్‌, తాళింపు కోసం – ఆవాలు – ముప్పావు టీస్పూన్‌, కరివేపాకు రెబ్బలు – 4, నూనె – తగినంత.

కూర అరటికాయ పొడి కూర తయారు చేసే విధానం..

మసాలా పొడి కోసం తీసుకున్నవన్నీ వేయించి పక్కన పెట్టాలి. చల్లారాక పొడి చేయాలి. మసాలా ముద్ద కోసం తీసుకున్న కొబ్బరిని కొద్దిగా వేయించాలి. గోధుమ రంగులోకి మారాక పక్కన ఉంచాలి. ఇప్పుడు దీనికి చింత పండు, బెల్లం తురుము, తగినంత ఉప్పు చేర్చి మెత్తగా రుబ్బాలి. అందులోనే మసాలా పొడి కూడా కలిపి ఉంచాలి.

ఉల్లిపాయను సన్నని ముక్కలుగా కోయాలి. అరటి కాయల్ని ఉడికించి తొక్కు తీసి ముక్కలు ముక్కలుగా పొడి పొడిగా ఉండేలా చిదమాలి. బాణలిలో నూనె వేసి తాళింపు దినుసులు వేసి వేగాక ఉల్లిపాయ ముక్కలు వేయించాలి. ఇప్పుడు అరటికాయ ముక్కలు, మసాలా ముద్ద వేసి సిమ్‌లో పొడి పొడిగా అయ్యే వరకు వేయించి తీయాలి. దీంతో ఎంతో రుచిగా ఉండే అరటికాయ పొడి కూర తయారవుతుంది. దీన్ని అన్నంతో వేరే ఏదైనా కూరతో కలిపి తింటే ఎంతో రుచిగా ఉంటుంది. అరటి కాయ అంటే ఇష్టం లేని వారు కూడా వాటిని ఇలా వండితే ఎంతో ఇష్టంగా తింటారు. ఎంతో రుచిగా కూడా ఉంటుంది.