AP Volunteer : గత కొద్ది రోజులుగా పవన్ కళ్యాణ్.. వారాహి యాత్రలో భాగంగా వైసీపీ నేతలు చేస్తున్న అరాచకాలపై తీవ్ర ఆగ్రహం వ్యక్తం చేసిన విషయం తెలిసిందే. ఇందులో భాగంగానే వాలంటీర్ వ్యవస్థపై నిప్పులు చెరిగారు. ప్రభుత్వం అందిస్తున్న సంక్షేమ పథకాలు పేదలకు అందే విధంగా చొరవ చూపించాల్సిన కొందరు వాలంటీర్స్ అక్రమాలు చేస్తున్నారని ఆగ్రహం వ్యక్తం చేశారు. వాలంటీర్లను ఓటర్ల తనిఖీల్లో వినియోగించడంపై ఏపీ ప్రభుత్వంపై పవన్ ప్రశ్నల వర్షం కురిపించారు. గత కొంతకాలంగా ఏపీ వాలంటీర్ వ్యవస్థపై చర్చ జరుగుతోంది. వాలంటీర్లు సేకరించిన వ్యక్తిగత సమాచారం ఎక్కడికి వెళ్తుందని పవన్ ప్రశ్నిస్తున్నారు.
వాలంటీర్లు తప్పుచేస్తే ఎవరు బాధ్యత తీసుకుంటారని పవన్ నిలదీస్తున్నారు. వాలంటీర్లపై పవన్ కల్యాణ్ చేసిన ఆరోపణలకు… కేసులు పెట్టేందుకు ఏపీ ప్రభుత్వం సిద్ధమవుతోంది. అయినా పవన్ వెనక్కి తగ్గడంలేదు. ఈ విషయంలో తగ్గేదేలే అంటున్న పవన్… కోర్టుల్లో తేల్చుకుంటామంటున్నారు. రోజు రోజుకి వాలంటీర్ల వ్యవస్థపై పవన్ మరింత దూకుడు పెంచారు. ఆదివారం పవన్ కల్యాణ్ ట్విటర్ వేదికగా మూడు ప్రశ్నలు వేశారు. మై డియర్ వాట్సన్ అంటూ సీఎం జగన్ను సంబోధిస్తూ… అందరి ఆందోళన ఒక్కటే.. మీరు సీఎం అయినా, కాకపోయినా డేటా గోప్యత చట్టాలు మారవన్నారు. గతంలో వైఎస్ జగన్ ప్రతిపక్ష నేతగా ఉన్నప్పుడు డేటా చౌర్యం గురించి మాట్లాడిన వీడియోను పవన్ షేర్ చేశారు.
ఆధార్, బ్యాంకు ఖాతా లాంటి వ్యక్తిగత సమాచారం ఎవరైనా ప్రైవేటు వ్యక్తి వద్ద ఉంటే అది క్రైమ్ అని గతంలో జగన్ అన్నారు. ఇప్పుడు ఆయన చేస్తుంది ఏంటని ఆగ్రహం వ్యక్తం చేశారు. అయితే పవన్ కళ్యాన్ వాలంటరీ వ్యవస్థపై చేసిన కామెంట్స్ తో ప్రజలు సైతం అప్రమత్తం అయ్యారు. వాలంటీర్ పేరుతో తమ డేటాని తీసుకునేందుకు ఎవరు వచ్చిన వారిని గట్టిగా నిలదీస్తున్నారు. తాజాగా ఓ యువతి వాలంటీర్ అంటూ ప్రజల డేటా అంతా తీసుకుంటుండగా, ఓ వ్యక్తి నీ ఐడీ కార్డ్ ఏది, అపాయింట్మెంట్ లెటర్ ఏది, నువ్వు ప్రభుత్వానికి చెందిన వ్యక్తివని మాకు నమ్మకం ఏంటి అని ఆగ్రహం వ్యక్తం చేశారు. ప్రస్తుతం ఇందుకు సంబంధించిన వీడియో నెట్టింట హల్చల్ చేస్తుంది.
