Anantha Sri Ram : ప్ర‌స్తుతం ఏపీలో రాజకీయం చాలా వాడి వేడిగా ఉంది.మీటింగ్స్‌లోను, ప్రెస్ మీట్స్ లోను, సోషల్ మీడియాలోను ఒక‌రిపై ఒక‌రు దారుణ‌మైన విమ‌ర్శ‌లు చేసుకుంటున్నారు. ఈ క్ర‌మంలో మ‌ధ్య‌లో వేరే వ్య‌క్తుల‌ని కూడా లాగుతున్నారు. తాజాగా అనంత శ్రీరామ్‌ని కూడా ఇందులోకి లాగారు. దాంత ఆయన వివర‌ణ ఇచ్చుకోవ‌ల్సి వచ్చింది. పొలిటికల్ మిసైల్ అనే సోషల్ మీడియా అకౌంట్లలో దివంగత నేత, మాజీ ముఖ్యమంత్రి వైఎస్ రాజశేఖరరెడ్డిపై దారుణ‌మైన పోస్ట్‌లు పెడుతున్నారు. వైఎస్సార్‌ను అవమానపరుస్తూ, ఆయనకి వ్యతిరేకంగా ఈ పోస్టులు ఉంటున్నాయి.
పొలిటికల్ మిసైల్ అనే అకౌంట్లను జనసైనికులు నడిపిస్తున్నారని వైసీపీ నాయ‌కులు భావిస్తున్నారు. ఇదే క్ర‌మంలో ఇందులో సినీ గేయ రచయిత అనంత శ్రీరామ్ పేరు హ‌స్తం కూడా ఉంద‌ని వారు కామెంట్ చేశారు. అనంత శ్రీరామ్ ఈ వ్యాఖ్యలు రాసి ఇస్తున్నారని ప్రచారం మొదలు కాగా, దీనిపై అనంత శ్రీరామ్ స్పందించాల్సి వచ్చింది. నాటా సభల్లో పాల్గొనడానికి అమెరికా వెళ్లిన అనంత శ్రీరామ్.. అక్కడి నుంచే ఒక వీడియో మెసేజ్‌ను సోషల్ మీడియాలో పెట్టారు. వైఎస్సార్‌కు వ్యతిరేకంగా వస్తున్న రాతల వెనుక, పోస్టుల వెనుక తాను లేనని ఆయన స్పష్టం చేశారు.
దివంగత ముఖ్యమంత్రి, మహానేత శ్రీ వైఎస్ రాజశేఖరరెడ్డి గారికి వ్యతిరేకంగా, ఆయన్ని అవమానపరిచేలా పొలిటికల్ మిసైల్ అన్న ఖాతాలో కొన్ని రాతలు రాస్తూ పోస్టులు పెడుతున్నారు. ఆ రాతల వెనుక, పోస్టుల వెనుక ఉన్నది నేనే అని చెప్పి వదంతులు వ్యాపించాయి. నాకు.. ఆ రాతలకు, పోస్టులకు ఏమాత్రం సంబంధం లేదు. నేను అన్ని పార్టీలకు పాటలు రాస్తాను. అది నా వృత్తి. అంతేకానీ, ఏ పార్టీ మీద వ్యక్తిగతంగా నాకు ఏ అభిప్రాయం లేదు. అవన్నీ నమ్మొద్దని వైసీపీ శ్రేణులకు విజ్ఞప్తి చేస్తున్నాను’ అని వీడియోలో అనంత శ్రీరామ్ వెల్లడించారు. ఒకవేళ భవిష్యత్తులో రాజకీయాల మీద ఎలాంటి అభిప్రాయాలు తెలియజేయాల్సి వచ్చినా నిక్కచ్చిగా నిర్భయంగా తన అధికారిక సామాజిక మాధ్యమాల్లోనే తెలియజేస్తాను అని అనంత శ్రీరామ్ స్పష్టం చేశారు.
