Manchu Vishnu : మంచు మోహన్ బాబు త‌న‌యుడు విష్ణు డైనమిక్ స్టార్‌గా గుర్తింపు తెచ్చుకున్నాడు. అత‌ని డ్రీమ్ ప్రాజెక్ట్‌ ‘కన్నప్ప’ పై జనాల్లో ఇప్పటినుంచే భారీ అంచనాలున్నాయి. రీసెంట్ గా న్యూజిలాండ్‌‌లో లాంగ్ షెడ్యూల్‌ను పూర్తి చేసుకుని ఇటీవలే ఇండియాకు తిరిగి వచ్చింది కన్నప్ప టీం. ఇప్పటి వరకు ఈ చిత్రంలో మోహన్ లాల్, ప్రభాస్, మోహన్ బాబు వంటి హేమాహేమీలు నటిస్తున్నారని ప్రకటించారు. మంచు విష్ణు వారసత్వంగా అవ్రామ్ మంచు, కన్నప్పతో ఎంట్రీ ఇవ్వబోతున్నారు. టార్చ్ బేరర్, లెజెండరీ భారతీయ నటుడు డాక్టర్ ఎం.మోహన్ బాబు నుంచి మొదలుకొని ఈ చిత్రంలో మూడు తరాలకు చెందిన మంచు కుటుంబ సభ్యులు నటిస్తున్నట్టు అయింది.
ఈ సినిమాను ప్రతిష్ఠాత్మకంగా చేపట్టిన మంచు వారబ్బాయి.. బడ్జెట్‌ గురించి ఏమాత్రం వెనుకడుగు వేయకుండా రూపొందిస్తున్నారు. క్యాస్టింగ్‌తో మొదలుపెడితే గ్రాఫిక్స్‌ దాకా ఎక్కడా కంప్రమైజ్‌ కావడం లేదు. దీంతో ఈ సినిమా ఎలా ఉండబోతుందో చూడాలని తెలుగు ప్రేక్షకులు ఆసక్తిగా ఎదురుచూస్తున్నారు. ఈ క్రమంలో భక్త కన్నప్ప గురించి మంచు విష్ణు కీలక అప్‌డేట్‌ ఇచ్చాడు. అంతేకాదు ఈ సినిమాలో ప్రభాస్ పాత్ర ఎలా ఉండబోతుందో చెప్పి.. రెబల్‌ స్టార్‌ ఫ్యాన్స్‌కు ట్రీట్‌ ఇచ్చాడు. కన్నప్ప సినిమా విడుదల కోసం సౌత్‌లోనే కాదు నార్త్‌ ఆడియన్స్‌ కూడా అడుగుతున్నారని మంచు విష్ణు చెప్పాడు. ఈ సినిమా షూటింగ్ దాదాపు 60 శాతం పూర్తయ్యిందని.. తొందరలోనే మిగతా పార్ట్‌ షూటింగ్ కంప్లీట్‌ చేస్తామని తెలిపాడు. ఈ ఏడాది చివరలో ఈ సినిమాను ప్రేక్షకుల ముందుకు తీసుకొచ్చేందుకు ప్రయత్నిస్తున్నామని తెలిపాడు.
త్వరలోనే కన్నప్ప గ్లింప్స్‌ విడుదల చేస్తామని మంచు వారబ్బాయి చెప్పాడు. అంతేకాదు ప్రభాస్ రోల్ గురించి కూడా చిన్న హింట్ ఇచ్చాడు. ఈ సినిమాలో ప్రభాస్ పాత్ర చాలా అద్భుతంగా ఉంటుందని అన్నాడు. దీనికి సంబంధించిన పూర్తి వివరాలు ఇప్పుడే చెబితే థ్రిల్‌ ఉండదని.. సమయం వచ్చినప్పుడు తానే వెల్లడిస్తానని అన్నాడు. మరో నెలలో న్యూజిలాండ్ వెళ్లాలని.. మిగిలిన షూటింగ్ కూడా అక్కడే కంప్లీట్‌ చేస్తామని చెప్పాడు. మంచు విష్ణు. చాన్నాళ్ల పాటు న్యూజిలాండ్ లో ఉన్న ఈ నటుడు, తాజాగా సంక్రాంతి సంబరాల కోసం హైదరాబాద్ వచ్చాడు. పండగ సందర్భంగా ఓ టీవీ ఛానెల్ తో మాట్లాడిన మంచు విష్ణు, కన్నప్ప షూటింగ్ వివరాలు బయటపెట్టాడు. కన్నప్ప షూటింగ్ 60శాతం షూటింగ్ పూర్తి చేసుకుంది. ఇంకా 40శాతం పెండింగ్ ఉంది. మిగిలిన భాగం షూటింగ్ కోసం వచ్చేనెలలో మరోసారి న్యూజిలాండ్ వెళ్లనుంది యూనిట్.
