YS Sunitha Reddy : వివేకానందరెడ్డి హత్య కేసులో వాస్తవం ఏమిటనే విషయంపై ఇప్ప‌టికీ సందేహాలు ఉన్నాయి. సీబీఐ కోర్టులో సీబీఐ దాఖలు చేసిన ఫైనల్ చార్జిషీటులో ఏముందనే విషయం ఇప్పుడు అయోమయంగా తయారైంది. ఎందుకంటే ఫైనల్ చార్జిషీటులోని అంశాలు ఇవే అంటూ మీడియాలో పరస్పర విరుద్ధమైన కథనాలు కనిపించాయి. అయితే తాను న్యాయం కోసం ఐదేళ్లుగా పోరాడుతున్నా ఫలితం లేదని వివేకా కుమార్తె సునీతా రెడ్డి ఆవేదన వ్యక్తం చేశారు. అవినాష్తో నిందితులకు వ్యక్తిగతంగా సంబంధాలు ఉన్నాయనేందుకు కాల్ డేటానే నిదర్శనమన్నారు. హత్య జరిగిన సమయంలో అవినాష్ – ఎర్ర గంగిరెడ్డి మధ్య కాల్ సంభాషణ జరిగిందని, తెల్లవారుజామున జరిగిన కాల్ డేటా వివరాలు సీబీఐ ఇవ్వలేదని అన్నారు సునీత.
ముమ్మాటికీ వివేకాను హత్య చేయించింది అవినాష్ అని, సాక్ష్యాధారాలున్నాయంటూ పవర్ పాయింట్ ప్రజెంటేషన్లో సంచలన విషయాలు వెల్లడించారు. పైస్థాయిలో ఒత్తిళ్లు ఉన్నందునే వివేకా హత్య కేసు విచారణ ముందుకు సాగడం లేదని, సీబీఐ చేయాల్సింది ఇంకా ఉందని ఆమె అభిప్రాయపడ్డారు..తాను ప్రదర్శించిన దృశ్యాలు చూస్తే వివేకాది గుండె పోటు అని ఎవరైనా అనుకుంటారా అని సునీత ప్రశ్నించారు. హత్య జరిగిన రోజు రాత్రి, ఆ తర్వాత రోజు ఉదయం కాల్ డేటాతో పాటు గూగుల్‌ టేకౌట్‌, ఐపీడీఆర్ డేటాను సునీత వెల్లడించారు. మొదటి ఛార్జిషీట్‌లో సీబీఐ నలుగురి నిందితుల పేర్లు చెప్పిందన్న సునీత, ఏ1 ఎర్ర గంగిరెడ్డి, ఏ2 సునీల్ యాదవ్, ఏ3 ఉమాశంకర్‌రెడ్డి, ఏ4 దస్తగిరి అని తెలిపారు.
ఏ1 ఎర్ర గంగిరెడ్డితో అవినాష్‌కు పరిచయం ఉందని, సునీల్ యాదవ్‌కు తమ్ముడు ఉన్నాడని అతడి పేరు కిరణ్‌ యాదవ్ అని అన్నారు. అవినాష్, భాస్కర్‌రెడ్డితో కిరణ్‌ యాదవ్ ఉన్న ఫొటోలు చూపించిన సునీత, ఏ3 ఉమాశంకర్‌రెడ్డితోనూ అవినాష్‌కు పరిచయం ఉందని అన్నారు. ఉమాశంకర్‌ రెడ్డికి అవినాష్ నుంచి వచ్చిన ఫోన్ కాల్స్ వివరాలను సైతం సునీత చూపించారు. ఎం.వి.కృష్ణారెడ్డి వివేకాకు చాలా సన్నిహితుడన్న సునీత, శివ శంకర్‌ రెడ్డికి, ఎం.వి.కృష్ణారెడ్డి మధ్య ఫోన్ కాల్స్ ఉన్నాయని పేర్కొన్నారు. భాస్కర్‌రెడ్డి ఫోన్ మార్చి 14వ తేదీ రాత్రి నుంచి 16వ తేదీ ఉదయం వరకు స్విచ్ఛాఫ్లో ఉందని అన్నారు. గంగిరెడ్డి, సునీల్ యాదవ్ల మధ్య ఫోన్ కాల్స్ ఉన్నాయని, ఐపీడీఆర్ డేటా ప్రకారం అర్ధరాత్రి 1.37 నిమిషాలకు గంగిరెడ్డి అవినాష్ రెడ్డికి ఫోన్ చేశాడని తెలిపారు. అర్ధరాత్రి ఒకటిన్నర నుంచి రెండున్నర గంటల మధ్య నాలుగు కాల్స్ ఉన్నాయని, ఈ మధ్య సమయంలోనే వివేకానంద రెడ్డి హత్య జరిగి ఉండవచ్చని అనుమానం వ్యక్తం చేశారు. హత్య జరిగిన తెల్లవారుజామున 4, 5 గంటల మధ్య చాలాసార్లు కాల్స్ చేశాడని, ఆ కాల్స్ ఎవరికి వెళ్లాయని ప్రశ్నించారు.
