Balakrishna : గత కొద్ది రోజులుగా పవన్ కళ్యాణ్ వ్యాఖ్యలు ఏపీలో సంచలనం రేపుతున్న విషయం తెలిసిందే.వారాహి విజయ యాత్రలో భాగంగా ఇటీవల గ్రామ, వార్డు వాలంటీర్ల విషయంలో జనసేనాని పవన్ కళ్యాణ్ కీలక వ్యాఖ్యలు చేశారు. ఈ క్రమంలో వివిధ పత్రికలు, ప్రసార మాధ్యమాల్లో వచ్చిన వార్తల ఆధారంగా పవన్ కళ్యాణ్పై కేసు నమోదుకు ఏపీ ప్రభుత్వం అనుమతి ఇచ్చింది. జులై 9వ తేదీన ఏలూరు సభలో పవన్ కళ్యాణ్ మాట్లాడుతూ.. రాష్ట్రంలో 29 వేల మంది మహిళలు అదృశ్యమయ్యారని, వీరిలో కొంత మంది మాత్రమే ట్రేస్ అయ్యారని.. మిగతా వారు ఏమయ్యారో తెలియదని వ్యాఖ్యానించారు.
వాలంటీర్లు సేకరించిన సమాచారం సంఘ విద్రోహ శక్తుల చేతుల్లోకి వెళ్తోందని ఆరోపించారు. ఆయన వ్యాఖ్యలపై.. పరువు నష్టం కేసులు పెట్టాలని పబ్లిక్ ప్రాసిక్యూటర్లను ఆదేశిస్తూ గ్రామ, వార్డు వాలంటీర్లు, సచివాలయాల శాఖ ఆదేశాలు జారీ చేసింది. ఇందులో భాగంగా రీసెంట్గా మంగళగిరిలోని జనసేన పార్టీ కేంద్ర కార్యాలయంలో నోటీసులు అందజేశారు. అయితే పవన్ కళ్యాణ్ కి నోటీసులు అందజేయడంపై జనసైనికులతో పాటు టీడీపీ నాయకులు కూడా ఆగ్రహం వ్యక్తం చేస్తున్నారు.బాలకృష్ణ రీసెంట్గా ఓ ప్రెస్ మీట్లో మాట్లాడుతూ.. వైసీపీ నాయకుల చర్యలని ఖండించారు.
టీడీపీ జాతీయ ప్రధాన కార్యదర్శి నారా లోకేశ్ యువగళం పాదయాత్ర చేస్తున్న నేపథ్యంలో టీడీపీ శ్రేణుల్లో కొత్త ఉత్సాహం కనిపిస్తోందని, లోకేశ్ యువగళం పాదయాత్ర చేస్తుండడంతో ప్రభుత్వం భయపడుతోందని విమర్శించారు. అందుకే లోకేశ్ పాదయాత్రకు ఆంక్షలు, నిబంధనలు విధిస్తున్నారని తెలిపారు. తన అల్లుడు లోకేశ్ ప్రజాసమస్యలు తెలుసుకునేందుకు, యువతకు జరుగుతున్న అన్యాయాన్ని నిలదీసేందుకే యువగళం చేపడుతున్నాడని బాలకృష్ణ స్పష్టం చేశారు. తాను అప్పుడప్పుడు వెళ్లి లోకేశ్ ను కలుస్తుంటానని వివరించారు. పవన్ అంత మంచోడిని తాను కానని చెప్పిన బాలకృష్ణ.. ఆయన దిష్టిబొమ్మలు దగ్ధం చేస్తే మగాడివి అయిపోతావా అని స్ట్రాంగ్ వార్నింగ్ ఇచ్చినట్టు తెలుస్తుంది.
